كنت على طول بقول إن يوم ما عملوا النت كان يوم أسود على البشرية. امبارح، الراوتر وقع على الأرض والواي فاي انقطع عن البيت كله، قلت الحمد لله دي فرصة أفك فيها شوية من النت.
جلسة العائلة بدون إنترنت
خرجت من غرفتي، عملت فنجان قهوة وقعدت في الصالة شوية، فجأة لقيت ابني خارج من غرفته، وأول ما شافني جري عليّ بالأحضان والبوس. عملنا شاي وقعدنا ندردش شوية.
لحظة اللقاء غير المتوقعة
سألته:
"أخبارك إيه يا ابني؟ خطبت ولا لسه؟ وشغال فين؟" قاطعني وقال لي: "سيبك من
أخباري، حضرتك عامل إيه؟ وأجازة النهاردة من الشغل ولا مزوغ؟"
ضحكت
وقلت له: "لا، دا أنا طلعت معاش من سنتين، وأنت فين دلوقتي؟" قال لي: "أنا
اتخرجت ودخلت الجيش وقربت أخلص، حضرتك وحشتني يا بابا، بس والله شكلك
متغيرش كتير عن زمان، بس شوية الشعر الأبيض".
اجتماع العائلة الغير متوقع
القعدة طولت وخرج ابني الصغير من غرفته وانضم للقعدة شوية، وفجأة جرس الباب رن، لقيت ابني الكبير داخل هو ومراته وابنه الصغير (حفيدي). كنت ناسيهم تمامًا، ما شاء الله، ابني الكبير اتخرج واشتغل، وآخر العنقود اللي لسه كنت مقدم له في الحضانة بقى في الإعدادية.
المفاجأة الأكبر: ظهور الزوجة
المفاجأة الحلوة بقي لما لقيت باب غرفة مراتي بيزيق وبيفتح بالعافية، وشوية لقيت مراتي جنبي وهاتك يا بوس وعياط. قالت لي: "أنت هنا في مصر؟ وأنا معرفش؟ أنا فاكرةك لسه في الشغل!" قلت لها: "أنا طلعت معاش من زمان، بس أنتِ ما شاء الله، الزمن مالوش دعوة بيك".
النهاية التقليدية: عودة الواي فاي
كانت مراتي بتقترح نتغدى سوا بالمناسبة الحلوة دي، لكن يا خسارة، إشارة الواي فاي رجعت. سلمنا على بعض وكل واحد رجع أوضته وانا كنت بفكر ناخد صورة جماعية للذكرى. ابني قال لي: "مفيش وقت، نقترح كل واحد ياخد صورة سيلفي لنفسه ويبعتها له، وهو يعمل لها مونتاج وتبقى جماعية". والله طلعوا ناس طيبين.
بتمنى أن الواي فاي يتعطل على طول ونرجع لبعضينا. ❤🤗
متأكد أن النص فيه مبالغة شوية، بس للأسف هو جزء من واقع حال الناس.
